نسيتني علّمني شْلون أبنساك

في هالزمن نسيان الأحباب عادي

وشلون لامرّت على البال ذكراك

وطيفك سرق مني لذيذ الرقادي

وشْلون لا قالوا لي الناس وش جاك ؟

من كنت في لذّة منامك تنادي

وشْلون اعيش اللي بقالي بليّاك

لا من غدينا كل واحد بوادي

لو قلت اداوي جرحي اللي تباطاك

ماكلّ جرح يْفيد فيه الضمادي

أعلنت حبك لين كلٍّ تمناك

غلطة وغيري من خطاي استفادي

لو لي مثل قلبك تمنيت فرقاك

واكيد قبلك بالجفا صرت بادي

حلوه عذاريبك وحلوه مزياك

حتى بيوم فراقنا كنت هادي

كنّ الليالي ودها تكسب رْضاك

وأنا يطول مْع الليالي جهادي

في ذمتي .. ماهي غريبة خطاياك ،،

مبطي وقلبك لو تنبّهت غادي !

سهلة على من كان مثلك وشرواك ،،

مثل الثياب يغيرّون المبادي،،

علمني أكره ذكرياتك وطرياك

وأنسى من الليلة صدوق الودادي

ولانيب قايل عقبها وين أبلقاك ؟

راضي لو إن جروح قلبي جدادي

وإلاّ القصايد جعلها من فداياك

لبّستها مبطي ثياب الحدادي

باكر على المخطي يدورنّ الافلاك

ونشوف من يصعب عليه البعادي !

متعب التركي